عن نصير شمة راح اتكلم و أقول

عمري ما كنت من الفئة المرتادة للاوبرا ولا عمري كنت بحب إني اروح حفلات لايف , و لما كنت بحب أحس بأني نفسي أسمع حاجة جديدة كنت بادخل اونلاين أدور على تراكات ياني و عمر خيرت بس , ما كنتش بحاول أعرف فية مين غيرهم في مجال الموسيقى , أصلي ماكنتش مقتنع إن فية حد ها ييجي بعد الاتنين دول و يعمل حاجة إحنا ممكن نصنفها على إنها موسيقى

كنت مرة قاعد باتابع برنامج “مباشر مع ” على قناة الجزيرة أملا من إني ألاقي حد من مخاليق ربنا أتريق علية في سلسلة فسافيس و كانت الحلقة مع نصير شمة , كنت باسمع إسمة كتير و باشوف إعلانات حفلاتة على باب الأوبرا بس عمري ما حاولت أفكر الراجل ده بيعمل أية , و عرفت أنة مؤلف موسيقي ساعتها  , الحقيقة رزانة أسلوبة شدتني أتفرج على الحلقة و لكن لما بدأوا يتكلموا عن القضايا السياسية حسيت إن الموضوع هايقلب بملل و غباوة
بس ربناستر و هو الراجل نفسة قصر في الكلام و في أخر الموضوع المذيع طلب منة أنة يعزف حاجة من حاجاتة للمشاهدين , الصراحة ساعتها فركت عيني و قلت أتأكد إن دي الجزيرة مش اليوم المفتوح بتاع القناة الأولى , بس طلعت فعلا دي قناة الجزيرة و اللي بيذيع البرنامج معد إخباري مش ماما نجوى ,
المهم انا بالفصيح كدة إنفرجت أساريري لأني أخيرا لقيت حاجة هاتريق عليها في المدونه هنا , وبدأت (بالفصيح برضة) أشحذ كل طاقاتي من أجل صب جام سخريتي على هذا الرجل و هذا المذيع و هذة القناة بل و على المشاهدين جميعا ( أنا مافيش حد أجمد مني في الفصيح , و اللي عندة كلمة يقفل بوزة , أيوة بقول بوزة مش بقة)

المهم …….

الراجل بدأ يعزف

و أنا نسيت كل اللي فات دة

أنا ما تصورتش إنى عمرى هاحب العود دة ولا هاحب حد من اللي بيعزفوا علية , و لكن الراجل دة علية فعلا عزف غريب , موسيقى غريبة تشدك تسمعها من أولها لأخرها, زمان كان العود دة أول ما بافتكرة ما بيجيش في دماغي غير حاجة واحدة , و هي فكرة التناحة , و طبعا انتوا عارفين مين اللي كان طول عمرة متنح و ماسك عود و بيقعد ورا مين , أفتكر الحمار دلوقتي الفزورة بالنسبة لة بقت سهلة

ملخص الكلام العود دة كان دايما في دماغي عامل زي الالات اللي كان بيستخدمها الأنسان الحجري و مش لازم نستخدمها دلوقتي , يعني من الاخر كان العود دة بالنسبة لي حاجة أروح اتفرج عليها في الانتكخانة مش اقعد مأنتخ و انا باسمعها, ولكن الراجل دة قدر يثبت إن العود دة اله تصلح لكل زمان و مكان و إن الأصل مش في  الاله الاصل في اللي بيستعملها

مفيش كام ساعة بعد ما البرنامج خلص و لقيت نفسي قاعد و باعمل Search على كل حاجة ليها علاقة بنصير شمة , و من موضوع لموضوع و من مقال لمقال و بدأت بعدها أنزل مقطوعات لية , و ساعتها أكتشفت إن الفترة اللي ماسمعتش فيها الراجل ده ضاعت هدر و ضاع معاها كتابات كتير كانممكن أكتبها و أنا باسمع موسيقاة , اللي بيكتبوا و هما بيسمعوا موسيقى أو تحت Mood معين هايفهموا كلامي كويس قوي , أقتنعت أن ريشة العود ساعتها زي ريشة الفنان التشكيلي مهما إتغير الزمن هاتفضل هي هي نفس الريشة و اللي ها يتغير هو اللي ماسكها و درجة إبداعة ,  مهما إتكلمت مافتكرش إني هاقول كل حاجة أنا عايز أقولها , المهم أني لسة عمال أدور لغاية دلوقتي على تراكات تانية ليه و أعيد سماع التراكات اللي نزلتها, الراجل ده قدر يحول العود لأداة عصرية تعزف ألحانا تضاهي في درجة جذبها للأذان أعظم الموسيقات العالمية , العود قد تحول بين يدية إلى أداه لرسم مشاعر أبناء هذا الوطن من بين معاناة و حنين و فرحة , موسيقاة معبرة بصورة كبيرة , تشعر معها و كأنك تشارك من يشارك هو في وصفة الزمان و المكان

فعلا خسارة إني ماسمعتش عنة من زمان