اخر تداوين السنة دية

اخر تداوين السنة دية

و انا متكلفت تحت البطانية

بكتب عن حلمي في عام جديد

هايكون أحسن م السنة دية

أخر حاجة هاكتبها في 2007 هحاول فيها أكتب سطرين عن كل حاجةقريتها او سمعتها او شفتها السنة اللي بتخلص دلوقتي, السنة دي كانت دسمة أوي بالنسبة لي, قريت كتير و شفت كتير و سمعت كتير و قابلت ناس أكتر, 2007 هاتفضل سنة مميزة بالنسبة لي, لأني رجعت أحتك فيها تاني بالعالم اللي كنت مفتقدة من زمان , 2007 شهدت في نصفها الأولاني ظهور مدونتي الأنجليزية و قبل نهايتها كانت المدونة العربية اللي بتقروها دلوقتي بتاخد أول خطواتها , هاسيب الحاجات اللي عملتها السنة دي هي اللي تدون 2007 كان في اية حوالينا :

كتب قريتها السنة دي :

• شكلها باظت – عمر طاهر : مهما إتكلمت مش هاوفي الكتاب دة حقة عمر طاهر قدر يعمل اللي كتاب كتير حاولوا يعملوة قبل كدة بس هو الوحيد اللي نجح بجدارة , اهلا بصلاح جاهين القرن الواحد و العشرين
• تاكسي -خالد الخميسي : فكرة كويسة و كاتب جدير بالأحترام , قدر يوصلنا نبض الشارع بصورة صادقة, كتاب كان لازم يصدر من زمان
• كابتن مصر – عمر طاهر : لسة مخلصة من كام ساعة يادوب , و لسة هاقول رأيي فية
• شيكاجو – علاء الأسواني : رواية مثيرة للجدل لكاتب مثير للجدل أكتر
• My life -Bill Clinton :بس لسه ما كملتوش
• Oliver Twist – simplified edition : لسة برضه باكمل فية

أفلام شفتها السنة دي :

• مطب صناعي – أحمد حلمي : كوميديا أحمد حلمي ستظل تفرض نفسها طالما بقيت الأنظف و الأقرب للواقع , ف “ميمي ” موجود بداخل كل شاب طموح
• خيانه مشروعة : معالجة بوليسية هائلة لقصة قد تحدث بل و تتكرر كل يوم في الحياة
• دنيا – جوسلين صعب : فيلم بلا هدف واضح , مشاهد بلا ترتيب كأنها قصاصات جرائد مجمعة بالرغم من أنها لا تتكلم عن نفس الموضوع , و مخرجة تحاول إحياء قضية بهدف أحيائها و خلاص بدون معالجة , من الأخر فيل بلا معالم لم يفيدة سوى الضجة التي سبقت عرضة
• الشبح- أحمد عز : صباح المزاولة و سحلة الدماغ , بس فكرة شديدة إننا نشوف اللي قريناه في قصص نبيل فاروق و شركاة في صغرنا على السنيما و إحنا كبار
• حين ميسرة – خالد يوسف : واقع لم نعهدة من قبل على شاشة السنيما , و إثبات شديد لعبقرية يوسف شاهين في إختيار ال Crew اللي بيشتغل معاة
• عمر و سلمى – بتاع تامر حسني : دخلتة عصب عني و ماقالوليش إلا بعد ما حجزوا تذاكر – بس بصراحة عجبني
• أحلام الفتى الطائش : دخلتة برضة و أنا مضطر أدخلة , و بصراحة بصراحة , دي أول مرة أشوف ممثل تطلع له شهادة وفاة قبل شهادة ميلاد في مجال الفن , رامز جلال كان ممكن يبقى أحسن من كدة

كلها كام ساعة و نودع 2007 و إحنا كلنا أمل و تفاؤل في إن 2008 تبقي فيها مشاهدات أكتر

مش بش مشاهدات بل و مشاركات كمان

حالة ملل

أول مرة من فترة طويلة أحس بالكم ده من خيبة الأمل في نفس الوقت,بس موضوع الأحساس بخيبة الأمل دة بقى شئ طبيعي بالنسبة لي , أصلمن الأخر انا حاسس إن لو الواحد ماحسش في يوم من الأيام أنة فاشل عمرة ما هيدور على النجاح بعد كدة , المهم …..
أصعب حاجة ممكن فعلا تواجة البني ادم انه يحس إن كل حاجة فجأة معانداة , مش هاقول بقت ضدة لأن لو كل حاجه بقت ضد واحد مش هاينفع يعيش من أصلة , حيث أنة لا هناك مفر من إستحالة الحياة في ظل عدم الرغبة في الحياة بصورة كاملة , أعذروني على الكلام دة بس أنا حاسس إني محتاج أتكلم.
أول مرة من فترة طويلة حاجات كتير في نفس الوقت تقف ضدي , و لأول مرة أدخل في الMood دة و اليأس ما يسيطرش عليا بصورة كاملة, الفرق بين اليأس و خيبة الأمل شعرة , و الشعرة دي هي الرغبة في مواصلة ما نفعل لنصل لما نريد, الواحد لو إستسلم لكل حاجة تخلية يدخل في الMood ده عمرة ما هيخلص أي حاجة في الدنيا , طبيعة الحياة لا تسمح إلا للكبار بس إن هما يعملوا اللي هما عايزينة , و الكبار هنا هما الناس اللي كبار بأسمهم بس بغض النظر عن المحتوى الروحاني ليهم أو قدراتهم الداخلية التي يمتلكونها و يسعون إلى إظهار قواها, لأننا دخلنا في مرحلة أضحت فيها القوى الداخلية و الكاريزما المعنوية من الأشياء الثانوية التي لا تجد اليوم لها مكانا بجوار قوة المادة ,كلام كتير جوايا

بس مش قادر أعبر عنة , و مش هاريف هاتكون نهاية الMood دة أية ……

بس برجع و أقول في الأخر
لسة مجاش الوقت اللي هاستسلم فية

الفسفوسة الأولى , بس طلعت دمل كبير

و أنا بالف على الأنترنت أدور على مواد تصلح للتعليق عليها في فسافيس لفتت نظري الصورة دي , الحقيقة أنا لما شوفتها في الأول ضحكت بس بعد ما دققت فيها أدركت كم المأساه اللي اللي صاحب الصورة دي فيها , و صاحب الصورة هنا معنا الشخص اللي إفتكس الحوار اللي في الصورة مش اللي صورها

إحنا فعلا في أزمه يا سادة , فعلا في أزمة , عمرنا ما بنعرف نعمل حاجة صح للأخر , حتى لما بنيجي نطالب بحقوقنا بنكون سفلة و قلالات الأدب

الصورة تكفي كتعبير  مع كامل إعتذاري للناس اللي خدشت حيائهم الشتيمه اللي في الصورة (مع إنها يعني ما بقتش شتيمة اليومين دول , و لو قلنا لحد يا إبن الكلب النهاردة يبقى just بنهزر معاة)

عامة , الصورة تكفي كتعليق , بس أحب أضيف في النهاية أني لو كنت شفت التعليق الخفيف ده كنت هاقف قصادة و أبووول علية , و كان هايكفيني شرفا إن واحد متخلف زي اللي كتبة يقول عليا إبن كلب ( ماهو الشتيمة ما بتعورش حد , إذن ف الشتيمة مش هاتعورني , بس أنا متأكد أن البي بي بتاعي هيخلية يندم على الكلمة اللي كتبها , لأنة لو ماكانش كتبها ماكنش واحد زيي هايجي على راس القرد و يشمها ) و أفتكر الناس اللي بتفكر زيي كتير , و زمان صاحبنا اللي كتب الكلمة دي قاعد في كنيف دلوقت ( أحسن عشان يبقي يتعلم يكتب عربي صح , يعني يكتب تتبول بدل تبول)

أول الفسافيس

من ييجي 6 شهور و في ليلة زي دي بالضبط ( الدنيا كانت مضلمة برضة – عارف إني سخيف ) أبتديت أول حلقة من ال Live Blogging على المدونة الأنجليزية بتاعتي و كان إسمها Snapshots و كان هدفي منها إني أقدر أوصل لقرائي القليلين جدا جدا الأحساس اللي جوايا مباشرة من نفس المكان اللي إتوجد فية الأحساس , و طبعا كان لازم أول مكان أبدأ أدون و أنشر منة ON AIR هو شاطئ الأسكندرية , الفكرة سمعت بس مع ناس قليلة أوي أوي , بس مع ذلك قررت أني أنقلها للمدونة العربية مع الأحتفاظ بحلقاتها كما هي على المدونه الأنجليزية , لأن كل واحدة منهم بتحتوي أفكار مختلفة تماما عن الأخرى ( يعني مش مترجمة يا عم الذكي ياللي فاكر كدة) , و عموما أديني هابدأ من النهاردة و أنتوا اللي هاتحكموا بقى , فكرة الموضوع ناس كتير ها تتهمني أنها مقتبسة من كتاب عرب كتير ( ركزوا في كلمة كتير دي لأن الحالة اللي أنا فيها دلوقتي دي حالة أسلوب مش إقتباس , يعني من الأخر ما سرقتش الفكرة من نافوخ حد, و مش هانطول في الحوار في النقطة دي لأنة هايقودنا لنظرية البيضة أم الدجاجة اللي كلنا عارفينها), عموما أنتوا اللي ها تحكموا في الأخر , قشطة !!!

بسم الله هانبتدي دلوقتي , و قبل ما نبتدي أود أن أنوة (أديني قلبت فصحى تاني !!!) أن كاتب فسافيس غير مسئول عن أي حد يفهم غلط و لامؤاخذة , اللي على راسة واوا بلاش يحسس عليها , خلاص , و عامة أنا ما بحبش الكلام في الكلام المجعلص الكبير , يعني ماليش دعوه بالمجالات اللي أنتوا عارفينها كويس

على فكرة انا حاسس إن المقدمة كدة طولت أوي و أنا أيدي وجعتني , أخيرا اللي عاوز يقرا و يشوف مواضيع الفسافيس بس هايلاقي ركن خاص بيها في الموقع عن طريق Tag إسمها فسافيس

بحب الأسكندرية

كل اللي يعرفوني يعرفوا انا بحب الأسكندرية قد اية , و أني بحاول أنتهز أي فرصه عشان أروح هناك أنشالله حتي يوم و أرجع , عملتها كمان كذا مرة لوحدي من غير ما أعرف حد بس بخاف أكون في بلد تانية لوحدي , بحلم أني في يوم من الأيام أقدر أعيش هناك , أكبر حلم في حياتي بجد أني أعيش في البلد دي على طول , حاولت كتير أعرف أنا لية بحب الأسكندرية بس ماعرفتش , كل اللي قدرت أوصلة هو أني بحبها و خلاص

البلد دي مش مجرد بحر و صيف و خلاص , البلد دي اللي عايز يشوفها يروحها في الشتا , أسكندرية في الشتا حاجة تانية و إسألوا اي حد راحها في الشتا , البلد دي مش شاطئ جميل ولا تمشية حلوه عالكورنيش بالليل , البلد دي مش بنت حلوه وجدعة و بميت راجل تقف جنبك وقت المحن , …….. البلد دي أكتر من كده بكتييير

نفسي أوصف لكم البلد دي أية , بس مهما إتكلم لساني أكيد مش هيعرف يوصف لكم البلد دي تبقي أية

يمكن في يوم أكتب حاجة عن البلد دي , قصيدة أو قصه قصيرة أو يكمن رواية أو دراسة بحثية

مش عارف

كل اللي أعرفة , أني بحب أسكندرية

اليوم الأول

قرائي الأعزاء

هذا هو اليوم الأول لي في التدوين باللغة العربية , في الماضي كنت أواجه مشاكل كثيرة لنشر أعمالي العربيه حيث أنني لا أجيد الكتابة على لوحة المفاتيح عامة و باللغه العربية خاصة , ولكن رغبتي للوصول إلى المزيد من القراء هي ما دفعتني اليوم لأبتاع لوحة مفاتيح باللغة العربية و أبدأ أول محاولاتي بالكتابة عليها و أظن أنني قد نجحت حتى الأن بغض النظر عن الوقت الذي إستهلكتة و المجهود الشاق الذي مازلت أبذلة حتى الأن

نقلب بقى للعربي بتاعنا و سيبنا من المقدمة المجعلصة دي , انا بالصلي عالنبي هاكتب هنا فصحى و عامية , هاكتب كل اللي عاوز أوصلة ليكوا , اللي قروا قبل كده حاجات ليا بالأنجليزي فاهمين أنا باكتب في أية و عايز أوصل لأية , بس يؤسوفني (زي سعيد صالح في العيال كبرت) أني أقول لكم أن كتاباتي بالعربي مختلفة تماما عن اللي بالأنجليزي (absolutely ) على رأي اللمبي في اللي بالي بالك , تابعوني دايما هنا تجدوا ما يسركم و يبهجكم و يزود ثقافتكم و ينضف مخكم ( أفتكر أنا واخد قلم في نفسي زياده عن اللزوم , بس و أية اللي فيها , من حكم في مدونته فما ظلم)

كفاية كدة النهاردة أيدي وجعتني